SUN奇古怪：Sun潮語【偷跳】正所謂妻不如妾、妾不如偷、偷不如偷不到……自古以嚟，用情不專嘅男人一街都係。但又自古以嚟中國人都對娶幾多個老婆，無乜宗教道德上嘅限制。香港地都係直至上世紀七十年代，先至立法實行一夫一妻制。以前港男仲可以三妻四妾，但自從取消納妾之後，有女友或有老婆但又貪情好色，意志薄弱之輩就惟有鬼鬼祟祟偷番薯，「偷跳」去也！
潮語「偷跳」意思就是瞞着配偶，偷偷去滾或者私會情人。
「跳」其實是代表跳舞，因為在上世紀70至80年代，當卡拉ＯＫ還未盛行時，去夜總會是要跳舞的，直至現在去「夜總會玩」仍有人會講成「去跳舞」。在舊時代，社會比較保守，男人去玩都會比較含蓄，摸下手仔攬腰跳舞已經相當滿足。所以男人去「偷跳」，其實係偷偷地去談談情、跳跳舞……
談情跳舞又唔一定要去夜總會，你亦可以隨時同朋友二號或隱藏情人，偷情幽會。經常「偷跳」嘅人指出，每次「偷跳」之後都會對正印好啲，因人總有一種贖罪心理，作奸犯科之後總會希望做番啲嘢，以減輕罪惡感。不過呢啲都係歪理，一次不忠，百次不用，被正印捉到斷正，咪一樣對自己身邊人帶嚟永久性嘅傷害！無論你做啲乜嘢都彌補唔到。「偷跳」雖然緊張刺激，但偷還偷，上得山多終遇虎，天網恢恢，「偷」始終係一項罪行，無論「偷跳」、「偷情」、「偷桃」、「偷柴」……都有機會被人捉，為免一失足成千古恨，大家都係切勿以身試法為妙！
第一手消息請下載on.cc東方互動iPhone/iPad/Android/Windows Phone Apps